login   anmelden   
 
Ja   nein   

15. Dezember – Advent, advent, der müllberg brennt!

Halli hallo treue leser meiner extrem spannenden berichte!

Jo do schauts wia boid i dro bi des monat, owa des liegt an dem dase ob morgn nemlich de nächsten 5 wochan quer durch indien untawegs bi und wascheinle koa zeit zan schreibn hom werd und solong woite eng don doch net af de foita sponnen.

Ba eich hot jo scho de ruhige adventszeit ogfongt und eigentlich do a owa ba mir is leida weda ruhig nu onsotzweise adventlich. Morgn kints jo don a scho de 2. kerzen am adventkronz ozündn und dazua weihnochtsliada singa, mei is des sche, wei des orzige wos ba mir zur zeit brennt is da müllberg vor unsan haus, so wird nemle des beseitigt wos sogor d’kia iwalossn. Des hoast bei mir riachts a net noch weihnochtskeks und zimt wia dahoam sondan noch vabrenntn plastik und ondare grauslige sochn. Oiso de weihnochtliche stimmung geht ma scho a weng o und a mei adventkalender föt ma gscheit, owa den ersetze einfoch dadurch dase jedn tog a kokonuss afmoch, obwoi des is a a weng fad wei oiwei des söwe drin is, owa nojo.

In letzter zeit hot se jo so einiges to, wobei leida net nur erfreuliche sochan dabei worn, owa fong ma amoi mit dem guatn o.
Nochdeme 1 wocha alloa im haus vo da gostfamilie wor san don vor zwoa wochan de neichn freiwilligen okema und i hob me sovü gfreit gonz aus, wei es gibt echt nix fadas wia alloa sei. Mir san jetzt ingesomt 8 leit, darunter zwoa schwedinnen (lina, linn) de ba mir im haus wohnan, 2 australierinnen (megan, brooke) de ba da gostfamilie wohnan und nurmoi zwoa aus belgien (hans, ita) de owa ba da ondan gostfamilie san. I vasteh me recht guat mit olle, besonders d’Ita und da hans san gscheit liab. D’schwedinnen san ziemlich ruhig owa dafia redn d’australierinnen umso mehr und es is echt a extreme gaudi mit erna. Und gestan hot ma doch d’brooke ernsthoft vazöt das in australien „Komissar Rex“ voi a beliebte serie is und sie hot gsogt sie muas se ba österreich bedonkn wei des is des orzige wos erna familie zumindest ormoi in da wocha zombringt, jeden donnerstog obnd wonsese olle mitanond „Inspector Rex“ oschaun. Oiso won des net geil is =).

Letzten dienstog worma don mit olle kids in an wossa-fantasy-park und es wor echt gscheit cool. I hob me zwor teilweis scho a weng ogschissn, besondas ba de ochta-bo-sochan und am ollemeisten ban rutschn, owa d’mescha hots oafoch so extrem gfreit und don hoe doch jedes moi wieda nochgebn wons me af irgend a so a todes-gerät afezaht hom. Des orzige depate wor, das ma den gonzn tog im nossn gwond umadum rena miasn hom und i, vagessn wiare bi, ho nu dazua truckane sochan zan wechseln vagessn, owa a wone an dem tog komplett runzlat hoamkema bi woas trotzdem a echt feines erlebnis.

Nun zu de schlechten nochrichten. Währende eng letzte wocha nu volla freid vazön woit das ma jetzt nochwuchs hom in odanadi, hot se des mittlerweile erledigt, wei d’mutter hot s’baby nochdems 13 tog oit wor mit an poista dastickt. Es is echt so org, owa woma de hintergründe kennt und woas wos a unehliches kind fia a frau in indien hoast, don vasteht mas trotzdem a weng bessa. Es tuat ma oafoch gscheit load fias baby und a fia sie, de hiazt damit leben muas, des orzige guate is das vor 2 tog zumindest wieda zu ihre ötan zruck kehrn kina hot, des vorher außeghaut hom nochdems außagfundn hom das schwonga is. Und i muas song fia mi is a a erleichterung dases jetzt nima siag, wei i glaub so wird’s ma leichta foin dase des ois a weng vagiss, hoffe zumindest.
Jo des wor de wochn und seit letzta wochn is a nu oas vo de mescha in odanadi vaschwundn und mir hom keine ahnung wos mit ihr passiert is, oiso i ko dawoi oafoch neta hoffn das ihr guat geht und das boid wieda unversehrt zruckkimt. Owa noch de ereignisse der letzten zeit gfreie me jetzt wirklich scho af a weng a entspannung und damit san ma a scho bei meiner Reise …

Oiso triff me nächsten montog mit da Meli in Goa und noch a poor tog relaxen am strond werdn ma se don am weg in norden afe mocha. I ko eng leida nu gor net mehr song, wei mas söwa nu net wissn wie und won ma wo genau hifohrn, owa a foto vom taj mahal koe eng fian jänner af jedn foi scho vasprecha. Mir wern genau 1 monat untawegs sei, oiso vom 17. dezember bis zan 17. jänner und i werd wascheinle oiwei ziemlich beschäftigt sei, des hoast hobts a weng a geduid mit mir won d’beontwortung vo de e-mails a weng länga dauat.

Soda i muas hiazt meine koffer pocken, i wünsch eng hoit olle a besinnliches weihnochtsfest und vielleicht gehtsese jo aus dase vor neijohr nurmoi vo mir hern loss!

28. Dezember - Singh is King und mir san dabei!

Jo grias eng liebe leute!

Wia gehts eich den? Da weihnochtstress is jo jetzt hoffentlich scho vorbei und jetzt kints endlich eichare ferien in vollen zuegen geniessen. Mir san jetzt scho den 11. tog unterwegs und wia ma ses denga ko is urlaub mocha in indien net gonz so entspannend owa dafia a umso groesseres abenteuer.

Mir hom de erste wocha am strond in goa in an kloan ort namens Benaulim vabrocht, unter anderem a weihnochten, und hom uns don am 25. mitn nochtzug noch bombay afgmocht. Obwoi ma se zerst docht hom 1 wochn nur relaxn is zvue, sama mittlerweile froh das ma se sovue zeit zum entspannen gnuma hom wei mir san jetzt seit 3 tog in bombay und i wissat net ob ma unsare gonzn erlebnisse do a so locka nahmatn woma net nu so relaxt vo goa waratn.

Oiso in Benaulim wors eigentlich nur gmiatlich, ebn strond liegn, essn, schlofn und ormoi homa se sogor radln ausborgt, owa des wor uns noch 2 stund eh a scho wieda z’stork und don homa se glei wieda am strond ghaut. Dafia homa am 3. tog gonz wos cooles gmocht, mir san nemle am strond ausreitn gonga! Es wor echt so supa, won auch ein etwas teurer spass, owa es is hoit einfoch a kindheitstraum vo uns beide gwen und des losst ma se hoit a amoi wos kostn. D’meli hot sogor a weisses pferd ghot, i hob me mit an braunen zfriedn gebn miassn, owa dafia wor meis des schnoeste, obwoi des den nochteil ghot hot dase den schen sonnenuntergong nur vaschwommen wahrgenommen hob, owa nojo cool wors trotzdem.
Mir hom a a neue bekanntschaft gmocht, mit an deitschen namens stefan, der wor eh gonz liab owa nochdema uns 3 tog long nochgrennt is und mir nie irgendwos gscheits sondan nur smalltalk mitanonda redn kina hom sama don doch froh gwen wia ma uns am 25. vo erm vaobschiedn kina hom.
Weihnochten wor a weng komisch, wei ehrlich gsogt is ma gor net recht wia weihnochten vorkema sondan wia jeda ondare tog neta das hoit am 24. am strond nu mehr nikolaeuse umadum grent san ois sunst, owa ba uns kimt jo normalerweis s’christkindl oiso hot me des a net wirklich in a weihnochtliche stimmung vasetzt. Mir hom uns hoit afd nocht in unsa lieblingsbar ghaut, hom se a weihnochts-sheesha und zur feier des tages a nu an guatn wein bestoet und hom hoit den sonnenuntergang beobachtet, und des wor echt voi gmiatlich, owa ebn nicht sehr weihnochtlich.

Am naechsten tog homa uns don in zug noch bombay gsitzt und nochdem don in da nocht imma wieda maennliche, indische haende za uns umagwondat san worma don froh wia ma don in da fruah aussteign und uns a zimma suacha kina hom woma vor soechana grapsch-attacken gefeit san.
Hom scho a weng sight-seeing gmocht, worn am strond vo bombay, hom a bootstour za ana insel gmocht und a poor tempel an besuch abgestattet, oiso eh des uebliche touristen-programm, owa am donnerstog wors don wieda besonders geil. San nemlich am Mittwoch vo an inder ogredt worn und der hot uns ebn vazoet dasa nu weisse leit fia a poolszene in an bollywood fuem namens "Singh is King" brauchat und mir wan hoit perfekt dafia, eh klor wei ma weiss san. Noch kurzer ueberlegung homa don zuagsogt und uns am naechsten tog um hoiwa 7 in da frua mit erm und a poor ondare weisse vorm mc’donalds troffn. San don mit an bus zu an 5-sterne hotel gfiahrt worn und wias don ghoasn hot „remove your clothes“ homa se in unsare bikinis gworfen und af de liegen zum sonnen ghaut, bis uns gsogt hom se woin das mir im pool af und o schwimman. Wos ma zerscht eigentlich mehr wurscht wor, hot se don ois reinste folter aussagstoet, wei des wossa nemle so ghoit wor dase echt schmerzen ghot ho, owa ois „filmstar“ derf ma do natiale net zimperlich sei. Hom don an 3 szenen 4 stunden draht und a wons scho a weng stork wor wors echt gscheit interessant. Und zum schluss homa sogor nu ondare rollen zuatoit kriagt, oiso i hob me don am beckenrond sitzn und mit de fias hoit im wossa so hin und her schlenkan derfn und d’meli hot nem de hauptdarsteller ausn wossa aussasteign miasn und zu ihra liege geh, oiso echt voi de supawichtigen rollen =). Um 1 am nochmittog worma don fertig und don homs uns in d’stodt zruck brocht und stoets eng vor mir hom sogor nu 400 rupien kriagt, oiso i glaub da weg noch hollywood is jezt nima weit =)!

Heit moch af jedn foi don nu a kloane shopping-tour durch bombay und um 12 afd nocht nehmama don in zug noch Varanasi, der don uebermorgen noch ana fast 30 stunden fahrt erst am ziel onkimt und i hoff echt das se de maenner in dem zug a weng mehr zomreissn kina, wei wone amoi 2 tog schlecht gschlofn ko und don wue do wer zaertlichkeiten mit mir austauschn wue kone glaube fia nix garantiern.

Nojo, i mochs jetzt wieda amoi gehat, i wuensch eich af jedn foi nochtraeglich nurmoi frohe weihnochten und an guatn rutsch und moedt me wieda noch silvester!
Homepage Erstellung und Pflege: Superweb Homepage-Erstellung