24. November - endlich!

Jo grias eng, i bis scho wieda oder bessa gsogt endlich wieda amoi. Nochdeme jetzt scho de ersten beschwerden kriagt ho, weie so sötn berichte schreib, hoe ma heit endlich dazua aufraffn kina dase in laptop eischoit und eng wieda über den neuesten stand der dinge informier.

Oiso in odanadi is scho ziemlich da alltag eingekehrt und allgemein in mein gonzen leben do, owa des is eh guat aso, wei jetzt fühle scho richtig dahoam. Es gibt zwor imma wieda neue und monchmoi a merkwürdige sochan zum entdecken, owa mittlerweile ko mi nix mehr so überraschen, weies eh scho woas das do einfoch ois „a weng“ ondas is.
Z.B. homa vor 2 wochan heiratstag in odanadi ghobt. Des schaut don ca. so aus das a poor mona noch odanadi keman, se olle mescha oschaun und don song kinan, ma de mechte gern heiraten. Don hängts nu vo de mescha ob obs woin, wei se kinan a na song und won oane einverstondn is don steht ana hochzeit nix mehr im weg. In unsan foi worn des 3 mona, owa nur d’ramya hot jo gsogt, oiso homa nexts monat a hochzeit zum feiern, owa mir san nu net sicha ob mir freiwilligen a eiglondt san. Am ofong muase zuagebn wore scho a weng schockiert, wei de kenan se hechstens 10 minuten bevorsese entscheidn miasn obs den rest ihres lebens mitanond vabringa woin, owa eigentlich hom de mescha in odanadi fia indische verhältnisse eh a extreme freiheit, nemle das überhaupt na song kinan, wei normalerweis wiast net gfrogt. Owa trotzdem a komische vorstellung, won des ba uns a aso wa.

Letzten Freitag worma don im odanadi für buama, owa während se des mir so vorgstöt hom das des genau so ausschaut wie odanadi für mescha neta kleana (wei es san 70 mescha und 10 buama) hot se odanadi fia buama ois baufällige lehmhittn, mittens in da pampa, ohne klo, liacht oda irgendwos aussagstöt, oiso do homa echt gschaut, net schlecht. Owa nochdem in indien eh normalerweis imma d’mescha benochteiligt san, findes don eh wieda net so ungerecht. Da tog söwa wor don extrem cool weis grod dabei san das a küch baun und do homa hoit a weng mithöfn derfn. D’Analisa, d’eva und i hom s’doch aus palmenblätter gewebt und d’ty und da daniel (a neicha freiwilliga aus belgien) hom an gonzn tog erd und wossa ogriad, aus dems d’waende mochan. Es wor zwor gscheit stork, owa es is scho a cools gfü wonst bei sowos mithüfst und a wone ma fost 100 % sicha bi das erna don im mai won da monsun ofongt gscheit ins heisl eina renga wird und de gonzn buama uns vafluacha wern, tuare me mittlerweile nima zvü owe, wei wons so weit is bin i eh scho wieda dahoam in sicherheit und brauch me net vor reklamationen fiarchtn.

Heit homa besuch vo da Sandra und da Amanda aus unsara orientation-week-gruppn kriagt. De zwoa orwatn in an heim fia behindate kinder 2 stund entfernt vo mysore und nochdems odanadi gseng hom woins unbedingt dobleibn, wei in ernan projekt d’kinda so wüd ghaut werdn und des fia d’lehra a nu recht a gaude is, oiso se san scho komplett fertig. I muas song wiare ghert hob das d’Sandra za uns kimt, hoe net recht gwisst obe locha oda rearn soit, wei nochdeme ma de gonze beachweek in Goa immer wieder gsogt hob: „Nur nu de wocha und don siages nie wieda. Nur nu de wocha und don siages nie wieda …“ und i mi echt de gonze wocha so zomreißn miasn ho dase koan streit mit ihr ofong, is doch irgendwie ironisch das genau sie de is de beschliaßt das uns besuchn wü. Mittlerweile hobe scho oan tog guat mit ihr umebrocht ohne dase irgend an streit ofong und morgn fohrts eh scho wieda hoam, oiso i glaub des dapacke a nu. Und des coolste is sowieso, wei sie jo sovü um ihr göd besorgt is und 6 € fia unterkunft, frühstück und obndessn zvü san, schloft sie ba ana frau in mysore de wos ormoi gseng hot und de za ihr gsogt hot sie kons besuchn wons in da stodt is (haha, de wird a freid hom), und desweng schloft neta d’amanda bei mir im haus. Oiso i muas song des is echt des erste moi dase einfoch neta donkbor bi fia a eigenschoft de i sunst so an ihr hoss. (Kurze Erklärung für meine Unsympathie: D’Sandra hot a ziemlich tiefgreifende störung, mir san mittlerweile zu dem schluss kema sie hot vo ihre ötan net gnuag aufmerksamkeit kriagt, nemlich dahingehend das sie nichts unversucht losst damits im mittelpunkt steht und des mit de ungewöhnlichsten methoden de ma se nur vorstön ko und a wons se jeda denkt: „Oita, wos isn mit dir foisch?“ und ihr des a jeda kena losst, is ihr des wurscht, wei sie hot ihr ziel erreicht, sie steht im mittelpunkt, won auch im negativen sinn.)

Oiso noch 2 monat Indien muase song bine scho so angepasst, i glaub s’hoamkema wird echt hort fia mi. An Gwondkostn volla salwaar kamez (de typische indische kleidung), an sari in da schneidarei, a henna-tatoo af de händ, lieber gold- statt silberschmuck, kokosnussöl für glänzendes haar (schaut don ca. aus wia noch 2 wochan net hoor woschn), za ois grundsätzlich 2 stund z’spot (obwoie zuagebn muas des hot net vü anpassung benötigt =) ), frösteln und auspockn vo jackn und schal ob 25 °C, verlust jegliches Gefühls für schärfe hinsichtlich essn, verzicht auf die benützung von klopapier … na stimmt eh net, zumindest des letztere. Sovü i a vasuach mi anzupassen, i glaub so weit das mein hond stottn klopapier nim wird’s doch nie kema, a net in 5 johr.

I ko engs gor net song, weie so a schlechts gwissn hob, owa i bin seit letzta wocha komplett armband-los, stöts eng des vor noch 2 johr des erste moi. Seit 3 wochan sans imma weniga worn, wei einfach a poor dabei san de an gonzn tog net trucka wern van schwitzn und am freitog hobe don endgültig de letzten drei entfernt, wobei da grund dafia wor das ma oane vo de mescha a tatoo af de händ mocha woit und des geht hoit net mit ormbandl. So gonz ohne olle meine glücksbringer und talismane, fühle me hiazt scho a weng schutzlos und wort neta draf das a unglück iwa mi hereinbricht, owa schliassts me hoit a weng efta in engare gebete ei, don wird scho ois guat geh.

Am sonntog fliagn d’eva, da daniel und d’ty hoam und d’analisa und d’marija san scho letztn Mittwoch abgereist, des hoast nexte wocha bine gonz alloa, obgseng vo da mileen de owa bei ana ondan gostfamilie wohnt. Morgn muase don meine sochan zompocka und umziagn, weie me gonz alloa im haus doch a weng fiarcht. Hob zwor long gezögert, wei im haus vo da gostfamilie muase s’zimma mit ana zweiten freiwilligen toin, owa schlussendlich hot doch mei gmiatlichkeit gesiegt, wei jetzt kone ma zumindest den 10 minuten fußmarsch jedn tog sporn, ma i bi so foi. Nextn somstog keman don de neichn freiwilligen und i fiarcht me scho a weng wei da daniel hot ma scho a poor gschichtn üwa erna vazöht de mei vorfreude eha in grenzn hoitn, owa i loss me oafoch überroschn, wird scho fesch wern, i bi eh so tolerant …

Jo i hob ghert ihr hobts scho an schnee (haha, i hobs jo gsogt) und i muas song i siag ma echt net load, wei es hot scho wos won ma a um 10 afd nocht mitn kurzn gwond nu drausd sitzn ko vo 1 million mosquitos umschwärmt und in der gewissheit dasd heit wieda amoi nix schlofn wiast weist bis in d’frua mitn krotzn beschäftigt bist. Eftas wone wieda amoi so a schlaflose nocht hinter hob wünschate ma echt neta nu a schnopsbod, owa i glaub des kamat net so guat bei de kinda o wone imma mit ana fahne umadum renat, oiso muase me dawoi mit fenistil creme begnügn.

Oiso i hoff hob enga neugier wieda weng stillen kina und i mödt me wieda im dezember (wons guat geht)!



PS: Mir worn scho wieda im fernsehn =)