10. Jaenner - Die liebe, die liebe
Seid gegruesst liebes leser-volk!
Nochdeme jetzt a hoechst entspannende Kerala ayurvedic massage hinter mir hob fuehle me endlich entspannt genug dase me wieda amoi vorn computer hau und eich iwa den neichesten stond der dinge aufklaer.
Wo hoe afghert … ajo Bombay. Jo oiso da letzte obnd wor nu gonz cool wei ma do nemle an deitschen kenaglernt hom der scho seit 5 johr dort lebt und der uns ziemlich interessante geschichten erzoeht hot. Z.B. dass in Bombay fia 16 Millionen leit genau eine klaeranlage gibt de vielleicht fia 100.000 menschen reicht und da rest wird einfoch ins meer geleitet. Und des beste dabei is jo das des haupt-obflussrohr des de gonzn abfaelle der stadt ebn ins wossa leitet in an falschen winkel obrocht worn is und desweng da gonze dreck jetzt net vo da unterstroemung erfasst und ins offene meer weggetragen wird sondan direkt vor da stadt wieda aufakumt und se don am strand ablagert. Vo dem homa se auch soewa am chowpathi beach iwazeugn kina, owa de leit is des wurscht das des wossa und da gonze sond schworz-braun san und de totn fische am strond liengan, se gengan trotzdem dort bodn a wons nocha dreckiga san ois vorher. Bombay is af jedn foi a extreme stodt und mir worn echt froh wia ma don im zug noch Varanasi gsessn san, owa leida net fia long …
De gonze fohrt hot ingesomt 32 stunden gedauert, darunter homa 2 naechte im zug vabrocht und des worn glaube echt de schlimmsten unseres lebens. Obwoie desmoi vo aufdringliche inder verschont wordn bi, hot ma de eiseskaelte de im zug gherrscht hot umso mehr zan schoffn gmocht. I kons net genau sogn wie koit das wor, owa uns is af jedn foi da atem geforen und wonst don neta a stoffhosn und an pullover ohost don wird da scho schnoe a weng koit. San don um 9 in da frua durchgfreart bis af de knochen in Varanasi okema und noch ana hoib-stuendigen horror-rickshaw fahrt worma don endlich ba unsan guest house wo uns voi a liabe deitsche de ma im zug kenaglernt hom a wossa aufkocht hot zum duschen, wei vo wormen leitungswossa kost in indien sowieso nur trama. Hom don ca. 2 tog braucht bis ma se dawamt hom, obwoie zuagebn muas so richtig worm is uns eigentle nie worn. Und woma don im bett glegn san und uns s’uns sogor mit haubn und schal nu hergrissn hot, don homa scho wieda efta an de zeiten zruck denkt woma in goa am strond glegn san und davo gredt hom wia supa das im norden wird wons don endlich a weng kuehler is *am kopf greif* … Owa trotz der kaelte hot uns Varanasi voi taugt, wos a an dem liegn ko das ma se beide dort valiebt hom, in den selben mann natuerlich, an franzosen, owa I glaub mir regeln des so, wer ois erstas wieda noch indien zruckkimt derf sen don schnappn. Natiale hots in varanasi a nu mehr gebn ois fesche maenner, net das hiazt moats, nemle z.b. de burning ghats wo am tog ca. 200-300 leichen vabrennt werdn und do kost don live zuaschau und und de vabrenntn kepf und fias seng und won da do don nu net schlecht wird bist eh scho guat dabei. Es horcht se jetzt zwor wued o, owa es is da traum vo jedn inder so zu enden und es wor scho irgendwie faszinierend, a womas don boid wieda gehat gmocht hom.
Silvester homa a nu in Varanasi vabrocht, wos a gonz cool wor, won a party-maessig net so spektakulaer, owa es wor scho a eigenes feeling um 12 an de ghats am ganges sitzn und s’feiawerk oschau … af jedn foi amoi wos neichs.
Noch 5 togen homa se don schweren herzens vo unsara grossen liebe, in dunja, vaobschiedt (nochdema uns nu a schochtl suessigkeiten kaft und fia uns af da sitar gspuet und gsunga hot … ma is der liiiaab) und hom se am weg noch agra gmocht. Hom uns don wieda a 300 rupees zimma gsuacht des mir spezialisten natiale af 200 owaghondlt hom und san glei, na net zan taj mahal grennt sondan essn gonga. Hom don an dem tog augrund meiner staendigen kopfschmerzn a nu ba an dokta vorbeigschaut, der ma don a spritzn eineghaut hot de me zerst taub und don blind gmocht hot, owa a hoiwe stund spaeta wore gott sei dong wieda im besitz all meiner sinne, do soge nur, glick ghot. Noch dem schock homas don a weng ruhiger ogeh lossn und san erst am naechstn tog zur taj mahal besichtigung aufbrochn des genau 50 meter vor unsara hotel-haustir gstondn is. Oiso wos soite vue sogn, ausschau wissts eh wias tuat, es is af jedn foi nurmoi um einiges beeindruckender wonst davor stehst, a won der touristenpreis von 750 rupees (inda zoin nur 20) mei begeisterung a bissl gedaempft hot. Jo da naechste tog wor don eha unspektaklaer, nochdem d’meli olle 10 minuten speibn grennt is und i im bett glegn bi und gflet ho “i wue net sterbn, i wue net sterbn” weie ma sicha wor i ho d’toiwut, oiso den tog hoe in mein tagebuch nur mit “…” kommentiert.
Naechste station … Jaipur, Hauptstadt von Rajasthan. San jetzt scho drei tog do und mittlerweile so fertig das ma de busfohrt noch Pushkar, an kloan ort in da wueste, echt scho gor nima dawortn kinan. Hom zum glick a liabs guest house gfundn wo ma se zurueck ziagn kinan wons uns wieda amoi zvue wird, owa komplett vakriacha kinama se jo a net. Oiso des nervige in dera stodt is oafoch des: Olle 2 meter steht irgend a hawara der de frogt “Yes madam, rickshaw?”, wonst af Bazaar umadum rennst muast schau das da net im vorbeigeh t-shirts iwan kopf ziagn und di don zwingan dastas kafst und don gibts nu de leit de da de gonze zeit irgendwoechane ondas schirchs klumpat odrahn woin und dafia preise valongan dast erna a detschn gebn mechst weista denkst fia wie depat hoitn de mi eigentlich. Jo so is des, owa natiale gibts a a poor schene sochn zum seng do wie z.B. d’oitstodt “the pink city” oda heit homa se in monkey temple ogschaut, obwoie do mehr vo de offn fasziniert wor ois vom tempel soewa … kennts me eh. Und gestan homa se a nu so a massage gegoennt, de ma wirklich dringend noetig ghobt hom und es wor echt entspannend a wone ma a bissl depat vorkema bi nochdems ma so an stoff-string umagschnoint hom in deme ausgschaut ho wia a sumo-ringer, owa nojo zumindest hot me a frau massiert, wei sunst wa de situation doch a weng peinlich gwen.
Nojo, des worn jetzt de ereignisse der letzten zeit, mir hom jetzt nu genau 7 tog zum reisn und d’zeit is so schnoe vagonga, gonz aus, owa i gfrei me a irgendwie scho wieda wone de gonzn odanadi-kids wieda siag und de aussicht af a weiches bett is natiale a net schlecht. Oiso don mochtses guat und bis zum nextn mal!
nein 
